Binili ko reng adwang maletang melaun na king panaun kaakit ku kaya

matigik keng kinawul. Kasabe dareng luwang binili king kanakung mata.

Penapis naku gulut. “makanyan talaga, makanyan talaga” ana ning kakung asawa.

Lalu kung mengulyak. Ating madudurug king kanakung salu! Anti yang mapipirat;

mapipirat king mas mangalating pirasung mengasalbag a anting dinat,

sibukan kong tinupun, pinulut; dapot miras ku keng arap ning kabaung

uli karin la papunta ding pirasu na ning salbag-salbag kung panamdam

a minuli king abu kayari kung mekintal katalan ku keng maputing kaun.

Kaung duduyan king magdili-dili kung anak a eku na akilala king pangayayat

Eke man rugu akawul! Ekeman a uma, at ekeman akayabe king malambat a panaun

Pauli na ning apulung banwang pamagdatun ku king marayung lugar

ban apaulu ing bagya bagyang mangalbu king anak kung makatuknang na ospital

Pilang minutu kung gagaga, meinaun kung bagya tsaka ke biklat ing maleta kung luma.

Pepalwel ke ing regalu ku kaya. Pyalungang bisikletang dutung, uling sabi na;

“Hello tang, karagul ku bisa kung maging siklista kalupa mu. Promise magpagaling ku!”